My Poem For NUNUK RAGANG

NUNUK RAGANG

Osorou tokou tangon di aki odu
Pinosusui kumaa sakag ngaawi
Haro iso nunuk tagayo
Nunuk taragang id Nunuk Ragang

Tumanud nopo diri susuyan
Nunuk, poinlimunduk konuluhan
Nakagamut id sungkad tana
Nakaraan om nokogirot

Id pialatan kogibangan om kawananan
Pungaranan Bawang Liwogu
Hino noh nantadon dagai
Nuntunon laid tinaru Kadazandusun

Nunuk Ragang pinomogunan
Nokopomusorou yi aki minimpanau
Minihas mintongkop pogun diti
Mongilo sorili winorun diti

Baino nokotongkop nodi
Nakakampung hiti hilo
Okon nopo id pogun Sabah
Sompomogunan minlibabou

Sundung kotongkop pinomorunan
Osorou dagai ika Nunuk Ragang
Tangon gulu au dagai olihuan
Sunduwan gulu soluhuton wagu

Koposiyon ya, poinsorili dika
Pomusarahan dagai gumuli dika
Kalangadan dagai tikid tadau
Oulit koposiyon miagal dii kodori

Tikid toun korikot yahai
Oinsanan kumakap id Nunuk Ragang
Miampai ginoris om sunduwan
Momuralan pomusarahan tobontol

Koiyonon pogulu id Nunuk Ragang
Tinaru miunung om misompuru
Tukad moningolig do Pogun Sabah
Miampai kolid tosundu Huguan Siou


Rinait dii:
Allan G Dumbong
Puru Takawas
Koisaan Koubasanan Kadazandusun
1/7/2006

(Source: The 11th Visit To Nunuk Ragang's Souvenir Magazine, KDCA, July 2006)